Nahulog sa kamot sa kapulisan ang usa ka indibidwal sa gikasang buy-bust operation didto sa Purok Bawi, Brgy. Central, Tarragona, Davao Oriental pasado ala 1:45 sa kadlawon niadtong nakalabay nga adlaw.
Ang operasyon gihimo sa mga personahe sa Drug Enforcement Unit sa Tarragona Municipal Police Station uban ang mga sakop sa PDEU, PIU DOPPO, 1st DOPMFC ug sa koordinasyon sa PDEA nga miresulta sa pagkasikop ni alyas “Korn” nga usa ka Street Level Individual.
Nakuha gikan sa suspetsado ang usa ka heat-sealed transparent plastic sachet nga adunay sulod sa gituohang shabu nga gibana-banang motimbang sa kapin o kulang 2 gramos ug adunay standard drug price nga Php13,000.00 ug uban sa nasakmit ang usa ka Php500 nga buy-bust money.
Gimarkahan ug giimbentaryo sa lugar sa nahitaboan ang mga nakumpiskang ebidensya uban sa mga saksi ug sa supek mismo, diin gipasabot usab siya sa rason sa iyang pagkasikop pinaagi sa pinulongan nga iyang nasabtan.
Sa pagkakaron ang dinakpan mag atubang sa kasong paglapas sa Republic Act 9165 (Comprehensive Dangerous Drugs Act of 2002) ug gikustodiya na usab siya sa Tarragona Municipal Police Station alang sa tukmang disposisyon.
Photo Courtesy to:Tarragona Municipal Police Station
