Wala mawad-i og paglaum si Department of the Interior and Local Government (DILG) Secretary Jonvic Remulla nga maaresto si kanhing Ako Bicol Party-list Representative Zaldy Co bisan pa sa mga babag sa extradition.
Gituohan nga kasamtangang anaa si Co sa Portugal diin, sumala ni Remulla, walay extradition treaty ang Pilipinas niini, busa gitouhan nga posibleng mao kini ang iyang gitaguan.
Gipasabot usab ni Sec. Remulla nga mahimong limitahan sa Portugal ang prosecution depende sa giingon nga nahimong krimen.
Matod niya, kung ang krimen nahimo sa wala pa siya makakuha og Portuguese passport, dili siya makasuhan; apan kung nahimo ang krimen human siya makakuha sa maong passport, posible nga ma-repatriate si Co.
Gipamugos sa kalihim nga mas migamay ang kalibutan ni Co ug mahimong pinaagi sa mga negosasyon mahatagan ug konsederasyon sa Portuguese government ang Pilipinas.
Una nang gikumpirma ni Remulla nga nasakote sa NBI ang mga asset nga gitouhang konektado kang Co kalakip na ang iyang mga kabtangan sa Forbes Park ug sa Bicol.
Kahinumduman nga nabulgar ang pangalan ni Co sa gitawag nga pinakadako nga corruption scandal sa ghost flood control projects sa ilalom sa Department of Public Works and Highways (DPWH) kalakip na sa isyu sa giingong budget insertions sa Kamara de Representantes.END
Photo courtesy to: CEBU NEWS
