Gipahibalo sa Commission on Audit (COA) nga adunay P6.45 milyon nga nausik nga pondo sa gobyerno tungod sa kapin 700 ka infrastructure projects sa Department of Public Works and Highways (DPWH) nga natanggong o wala magamit.
Sumala sa COA, adunay 747 ka proyekto ang wala mosunod sa mga probisyon sa ilang kontrata tungod sa kakulang sa saktong pagdumala ug pagmonitor sa mga responsable nga opisina. Daghan sa mga proyekto ang dili magamit tungod sa teknikal nga depekto ug dili tukmang pagtuman sa proyekto.
Gipasabot sa komisyon nga ang padayon nga depekto ug mga kakulangan mahimong makapeligro sa kaluwasan sa publiko, makaresulta og dugang kadaut sa mga imprastruktura, ug makausik og dugang pondo sa gobyerno kung dili dayon hatagan og aksyon.
Ang maong mga depekto ug kakulian nadiskubrehan sa mga proyekto sa lima ka District Engineering Offices sa Cordillera Administrative Region, usa sa Ilocos Region, 11 sa Cagayan Valley, 7 sa MIMAROPA, 7 sa Bicol Region, 9 sa Western Visayas, 2 sa Eastern Visayas, 2 sa Zamboanga Peninsula, 5 sa Northern Mindanao ug 2 sa Caraga.
Girekomendar usab sa COA ngadto sa DPWH nga magpahigayon ug regular nga inspeksyon ug pagmonitor sa tanang proyekto sa imprastraktura aron masiguro nga mahuman ang tanang proyekto subay sa giaprobahan nga mga plano.
Photo courtesy: inquirer
