Giberipika sa Armed Forces of the Philippines (AFP) ang mga taho nga ang Ukraine giingong nang-recruit og mga Filipino aron mosalmot sa gubat batok sa Russia.
Sumala ni AFP Spokesperson Col. Francel Margareth Padilla, daghan ang nagkatap nga sayop nga impormasyon karon, busa nag-amping ang AFP sa pag-assess sa tanang detalye nga mogawas bahin sa maong isyu.
Sa laing bahin, gipasabot ni Padilla nga una nang gihimakak sa mga embahada sa Ukraine ug Germany sa Manila ang maong balita.
Kini nga tubag naggikan sa pamahayag ni Russian Foreign Ministry Spokesperson Maria Zakharova, nga nag-ingon nga nagakuha matod pa ang Ukraine og mga Pilipino para modugang sa ilang pwersa militar ug hatagan og Schengen visa pinaagi sa embahada sa Germany sa Pilipinas.
Tungod niini, sumala ni Padilla, nakigkoordinar na ang AFP sa Department of Foreign Affairs (DFA) ug Department of Migrant Workers (DMW) aron masuta ug matubag ang maong isyu.
Photo courtesy: Armed Forces of the Philippines
