Gikompirmar sa Department of Transportation (DOTr) nga nakadawat na kini sila sa gisumiter nga rekomendasyon gikan sa Land Transportation Franchising and Regulatory Board (LTFRB) nga adunay kalambigitan sa pag-umento sa plete ngadto sa mga pampublikong transportasyon.
Matod sa buhatan nga kasamtangan kini gipaubos sa pagtuon ni acting Transportation Sec. Giovanni Lopez.
Wala hinuon nihatag og dugang detalye ang DOTr kabahin sa maong rekomendasyon. Gawas sa jeepney fare hike, segun ni LTFRB Chief Assistant Secretary Atty. Vigor Mendoza nga plano sab nilang ilakip ang mga provincial bus, airport taxis, ug Transportation Network Vehicle Service (TNVS).
Kahinumdoman nga nipahigayon og pulong ang LTFRB tali sa mga operators sa mga pampublikong transportasyon mahitungod sa pag-umento sa pletehan dungan sab sa padayon nga pagsaka sa presyo sa krudo sa mercado.
Samtang pipila sa mga grupo, nanawagan nga mahatag na unta sa mga driver ang fuel subsidy nga wala pa nila nadawat.
Photo Courtesy to:OpinYon news
