Gipahibalo sa Anti-Money Laundering Council (AMLC) nga nakakuha sila og dugang freeze order alang sa Php3.9 bilyones nga kantidad sa mga kabtangan nga konektado sa usa ka taas nga opisyal sa usa ka independenteng constitutional body ug kanhi opisyal, kalabot sa giingong mga anomaliya sa mga flood control projects.
Ang freeze order naglangkob sa 230-ka bank account, 15 ka insurance policy, duha ka helicopter, ug usa ka eroplano. Matod sa AMLC, kini may kalambigitan sa mga kalapasan sa Anti-Graft and Corrupt Practices Act ug Malversation of Public Funds.
Matod ni AMLC Executive Director Matthew David nga ang mga freeze order makatabang sa pagpalapad sa imbestigasyon sa posibleng mga kaso sa money laundering nga konektado sa flood control scandals.
Gipasalig usab sa ahensya nga ilang gukdon ang tanang nalambigit sa kurapsyon kalabot sa sayop nga paggamit sa pundo sa publiko.
Sa pagkakaron, anaa na sa Php11.7 bilyones ang kinatibuk ang kantidad sa frozen assets nga may kalabotan sa korapsyon, apil na niini ang 3,566 ka bank accounts, 198 ka insurance policy, 247 ka sakyanan, 178 ka real properties, ug 16 ka e-wallet accounts.
Photo Courtesy to:ibctv13
