Mikunhod ang paggasto sa imprastraktura sa Pilipinas sulod sa ikatulo (3rd) nga sunod-sunod nga bulan niadtong Septiyembre, tungod kay ang mga proyekto sa public works nagpadayon sa hugot nga gitutokan tungod sa iskandalo sa korapsyon, matod sa Department of Budget and Management (DBM).
Sa pinaka ulahing disbursement report niini kaniadtong Domingo, miingon ang DBM nga ang gasto sa imprastraktura ug uban pang capital outlays mikunhod og 42.6% ngadto sa Php78.7 bilyon niadtong Septiyembre gikan sa Php137.1 bilyon sa samang bulan sa miaging tuig. Kon itandi sa miaging bulan (Agosto), mikunhod kini og 7.2% gikan sa Php84.9 bilyon. Kini ang ikatulo nga sunod-sunod nga pagkunhod sa paggasto sa imprastraktura sukad sa 31.6% nga pag-ubos niadtong Hulyo.
Gitumbok sa DBM ang kalit nga pagkunhod sa paggasto sa imprastraktura niadtong Septiyembre ngadto sa pagkalangan o dili pagsumiter og billings sa mga kontraktor tungod kay ang mga opisina sa DPWH nagribyu sa implementasyon ug pagkompleto sa mga proyekto sa tibuok nasud. Kini nakaapekto sa pagproseso sa payment claims ug aktuwal nga disbursements sa DPWH, dugang niini.
Ang gipahugot nga pagpaniid gikan sa mga ahensya nga nagdumala, sama sa Office of the Ombudsman, Commission on Audit, Bureau of Internal Revenue, ug Department of Budget and Management, miresulta sa mas conservative ug cautious nga pagproseso sa payment claims.
Miingon usab ang DBM nga adunay freeze order sa pipila ka bank accounts sa mga implementing offices sa DPWH nga gipaubos sa imbestigasyon. Ang daotang panahon niadtong Septiyembre nakababag usab sa pagpatuman sa mga proyekto.
Photo courtesy: Inquirer.net
