Gisugyot karon ni Department of Health (DOH) Secretary Ted Herbosa ang total ban o hingpit nga pagdili sa paggamit sa vape sa Pilipinas.
Kini nahitabo taliwala sa kusog nga pagpanghimakak sa ahensya sa padayon nga pagpangumbinsir isip marketing strategy sa mga vape products.
Sumala sa DOH, kasagaran kini gipakita nga walay nicotine ug mahimong alternatibo sa sigarilyo, apan giingon sa ahensiya nga puno ang vape sa mga kemikal ug peligroso ang aso ug ang mismong aparato niini.
Gipahimangnoan usab sa DOH nga ang mga kabataan dali ra mailad sa colorful nga pakete ug lain-laing flavors sa vape.
Gipakita usab sa DOH ang resulta sa 2019 Global Youth Tobacco Survey nga nagpakita nga usa sa pito ka kabataang Pilipino nga edad 13 hangtod 15 ang migamit sa vape.
Sa miaging tuig, narekord sa nasod ang unang kaso sa pagkamatay human sa duha ka tuig nga paggamit sa vape.
Gipahimangno sa DOH nga delikado ang paggamit sa vape ug sigarilyo, nga mahimong hinungdan sa mga sakit sama sa cardiovascular disease, cancer, ug lung disease.
Samtang aron kini matubag , usa sa mga lakang nga gihimo mao ang padayon nga paghatag og hustong edukasyon sa komunidad, eskwelahan, ug lugar sa trabaho pinaagi sa DOH Health Promotion Bureau, kauban ang pagpalig-on sa mga serbisyo aron mapahunong ang panigarilyo.
Photo courtesy to: Wired
