LALAKING NALAMBIGIT SA VEHICULAR ACCIDENT NAKUHAAN OG MARIJUANA ATOL SA IMBISTIGASYON DAKPAN

Nadakpan ang usa ka 29-anyos nga lalaki human madiskubrehan sa iyang pitaka ang gidudahang dahon sa marijuana atol sa imbestigasyon sa usa ka aksidente sa karsada sa Purok 6, Barangay Ising, Carmen, Davao del Norte alas-9:00 sa buntag, Nobyembre 10, 2025.

Giila ang suspetsado nga si alyas Jonald, minyo, usa ka mag-uuma ug non-government beneficiary, residente sa Purok Concepcion, Barangay Dacudao, San Isidro, Davao del Norte.

Sumala sa report sa Carmen Municipal Police Station, ang mga sakop sa Mobile Patrol 2115 nga sila PCpl Ernold Eder ug Pat Rodrigo King Pero Jr. miresponde sa maong vehicular accident nga naglakip sa duha ka single motorcycles.

Pag-abot sa mga pulis, ilang namatikdan nga ang usa ka lalaki nagpakita og kabalaka ug misulay og dagan apan napugngan sa mga bystander. Sa dihang gipangayoan kini ni Pat. Pero sa OR/CR sa iyang motorsiklo, gipagawas sa suspetsado ang iyang pitaka diin nakita sa pulis ang ginadudahang dahon sa marijuana nga nakasulod sa usa ka gikumot nga papel.

Sapagkakaron anaa na sa kustodiya sa Carmen MPS ang dinakpan ug mag atubang kini ug kaso tungod sa paglapas sa Republic Act 9165 o Comprehensive Dangerous Drugs Act of 2002.

Photo Courtesy to:PNP DAVNOR Carmen