Giaprobahan sa Department of Budget and Management (DBM) ang kapin P1.684 bilyon nga pondo alang sa replenishment sa Quick Response Fund (QRF) sa Department of Agriculture (DA), Department of Social Welfare and Development (DSWD), ug Philippine Coast Guard (PCG) aron mapaspasan ang pagtubag sa mga kalamidad ug emerhensiya.
Sumala sa DBM, Php1 bilyon ang gigahin alang sa DA, nga gamiton sa rehabilitation programs sa mga rehiyong naapektuhan sa mga bagyo, ug isip standby fund para sa mga mag-uuma ug mananagat nga mahimong maapektuhan sa umaabot nga kalamidad. Matod pa ni DBM Secretary Amenah Pangandaman, dako kaayo ang epekto sa mga bagyo sa sektor sa agrikultura, busa ilang dali nga giaprubahan ang hangyo sa DA aron mapun-an dayon ang ilang Quick Response Fund.
Samtang, Php631 milyon ang giapod-apod sa DSWD nga gamiton sa pagpalit sa family food packs, non-food items, ug emergency cash transfers alang sa mga pamilyang apektado sa kalamidad. Gibana-bana nga makabenepisyo niini ang halos 59,000 ka pamilya. Dugang pa niini, niadtong Oktubre, nagpagula na usab ang DBM og Php1.982 bilyon aron mapun-an ang Quick Response Fund sa DSWD.
Sa laing bahin, Php53 milyon ang gihatag sa Philippine Coast Guard (PCG) alang sa ilang mga kalihokan sa relief, rehabilitation, ug search-and-rescue operations sa mga lugar nga naapektuhan sa bagyo.
Photo courtesy: Inquirer.net
