Gibarugan sa Department of Labor and Employment (DOLE) nga dili angay silotan sa mga amo ang mga empleyado nga mipili nga magpabilin sa ilang mga panimalay aron malikayan ang peligro tungod sa daut nga panahon.
Matud sa DOLE, walay administratibong tulubagon ang mga empleyado nga wala mo-report sa trabaho o midumili sa pagtrabaho sa ingon niini nga mga sitwasyon, tungod kay giisip kini nga usa ka makatarunganon nga lakang alang sa ilang kaluwasan.
Base sa Labor Advisory nga gipagawas sa departamento, subay sa Article 5 sa Labor Code of the Philippines nga gi-amendahan sa Republic Act No. 11058, mahimong i-aktibo sa mga pribadong kompanya ang ilang “management prerogative.” Ubos niini, gitugotan ang temporaryong pagsuspinde sa trabaho sa pribadong sektor panahon nga adunay hulga sa kaluwasan sa mga mamumuo.
Giawhag usab sa DOLE ang mga amo nga mohatag og dugang benepisyo o insentibo sa mga mamumuo nga mipadayon sa pagtrabaho taliwala sa daut nga panahon isip pag-ila sa ilang dedikasyon ug serbisyo.
Photo courtesy: DOLE
