Gipahibalo sa kadumalahan sa Iligan City Traffic Parking and Management Office (ICTPMO) sa publiko nga temporayo una nga makunhoran ang presensya sa mga traffic enforcer sa siyudad sugod kagahapong adlawa ,Byernes hangtod Domingo, Nobyembre 9, 2025.
Matod ni Bernald Gerenia, Administrative Head sa ICTPMO, nga gihangyo nila ang pagsabot sa publiko sa kakulangon sa mga personnel ning pipila ka adlaw, tungod kay aduna silay gitambongan nga Orientation Seminar.
Gidugang pa ni Gerenia nga ang maong seminar nagtumong sa pagpalig-on sa kapasidad sa mga traffic enforcer, aron mas mapalawom ang ilang pagpatuman sa balaod trapiko ug mas mapakita ang ilang commitment sa serbisyo publiko.
Gibutyag usab niya nga ang seminar nagdasig sa mga enforcer nga seryusohon ang ilang pagpanerbisyo, aron matabangan ang pagkontrol ug pagdumala sa trapiko sa Iligan.
Nanawagan usab si Gerenia sa mga enforcer nga mipailawom sa seminar nga sabton ang tumong ug tinguha sa ilang training, ug gamiton kini sa ilang pagbalik sa serbisyo.
Sa katapusan, gihangyo usab ni Gerenia ang katawhang Iliganon nga magpabiling mag-amping, ilabi na ang mga drayber, ug tumanon ang balaod trapiko, aron malikayan ang mga disgrasya sa karsada.
