Naghanyo ug nanawagan si Marlon Clapano, Hepe sa Security Management Division,Iligan City ngadto sa Budget Office ug sa tanan nga mo-apruba sa budgeting, nga unta hatagan ug pagtagad ang kakulangon sa pondo ug personel sa ilang buhatan. Kini iyang gibutyag atol sa pakighinabi sa Juander Radyo News Team.
Matod pa ni Clapano, sa iyang pag-take over ning tuig 2025, iyang Nakita nga kulang ang budget ug limitado ra usab ang ilang personnel, diin 112 ra ang job order employees nga nagbantay sa 32 ka installation sites.
Gidason pa niya, nga adunay nadugang sa ilang tahas nga angayang bantayan, hinungdan nga nag-single post na lang sila sa kasamtangan.
Gipasabot usab niya nga adunay mga higayon nga ang Security Management Division maoy naghupot sa seguridad sa mga event sa siyudad, lakip na ang mga kalihokan nga sakop sa LGU mandate.
Tungod niini, hangyo ni Clapano nga unta ang ilang budgetary proposal alang sa 2026 mahatagan og pagtagad, aron matubag ang ilang panginahanglan sa dugang 200 ka job order personnel ug mga sakyanan nga magamit sa monitoring ug roving operations.
