Niadtong tuig 1948, nalisang ang mga molupyo sa Clearwater Beach, Florida, human makakita og dagkong tunob sa baybayon nga murag gikan sa usa ka 4 metros nga nilalang gikan sa dagat. Tungod niini, misaka ang kahadlok ug kuryosidad sa katawhan, ug misulat pa gani ang mga pahayagan nga basin adunay “higanteng penguin” nga naglibot sa lugar.
Sulod sa kapin 40 ka tuig, wala gihapon masabti sa mga tawo kung unsay tinuod nga hinungdan sa mga tunob. Apan niadtong 1988, napadayag ang kamatuoran — usa ra diay kini ka prank. Ang nagbuhat mao si Tony Signorini, usa ka mekaniko, nga naghimo og metal nga sapatos nga porma og tiil sa dinosaur. Sa tabang sa iyang amigo nga nagmaneho og bangka, maglakaw siya sa baybayon sa gabii ug molukso balik sa dagat aron magbilin og misteryosong tunob.
Ang iyang binuang nahimong usa sa labing bantogan sa kasaysayan sa Amerika — ang “Giant Penguin of Clearwater,” usa ka alamat nga nagsugod tungod sa usa ka tawo nga gusto lang magpalingaw ug manglimbong.
Photo Courtesy to:Twistedsifter
