Misalmot ang Bukidnon Provincial Government, ubos sa liderato ni Gobernador Rogelio Neil P. Roque, sa 4th Quarter Nationwide Simultaneous Earthquake Drill (NSED) kagahapon, Nobyembre 6, 2025. Alayon na sa paningkamot sa pagpalig-on sa kaandam panahon sa kalamidad.
Gikabutyag ni PDRRMO Bukidnon Operations Head Anicito Torayno Jr. sa pakighinabi sa Juander Radyo Malaybalay nga mas komplikado ug realistiko ang ilang giplanong senaryo sa drill, lakip ang pagtakda sa “missing persons” ug mga “injured,” aron matun-an sa matag opisina kung unsaon pagresponde sa aktwal nga sitwasyon kung adunay linog.
Dako ang kalipay ni Torayno tungod sa kooperasyon ug partisipasyon sa halos tanan nga opisina sa LGU Bukidnon, samtang giawhag usab ang publiko nga magpadayon sa pagpangandam bisan walay kalamidad.
Ang kalihokan gibase sa Memorandum No. 458, Series of 2025, nga nagmando sa tanang Departamento sa Provincial Government Office (PGO) sa pagpalapad sa kahibalo ug kaandam sa matag empleyado sa opisina sa gobyerno, institusyon, ug komunidad sa pagresponde batok sa mga katalagman.
Gidumala kini sa Provincial Disaster Risk Reduction and Management Office (PDRRMO) sa pakigtambayayong sa Bureau of Fire Protection (BFP), agig kabahin sa inisyatibo sa Regional Disaster Risk Reduction and Management Council (RDRRMC) Region 10, sa pagdumala Antonio B. Sugarol, Regional Director sa Office of Civil Defense (OCD) Region 10, alang sa 2025 Quarterly Conduct of Nationwide Earthquake Drill.
