Giangkon sa usa ka 32-anyos nga lalaki nga giilang si Mayur Tarapara nga siya mismo ang nagputol sa upat nya ka tudlo sa iyang wala nga kamot aron lang makalikay sa iyang trabaho isip computer operator.
Sumala sa imbestigasyon, gusto ni Tarapara nga mobiya sa trabaho apan dili siya gusto nga diretsong mag-resign. Aron malikayan kini, nagpaka arong-ingnon siya nga na-aksidente, aron maideklarar nga “unfit” o dili na angay pabalikon sa trabaho.
Sa una, iyang gireport sa kapulisan nga nawala ang iyang mga tudlo, ug nagtuo pa ang mga awtoridad nga posibleng kuhaon kini alang sa ritwal sa itom nga mahika.
Gipangita sa mga imbestigador ang CCTV footage ug gipangutana ang mga saksi sa lugar diin giingon ni Tarapara nga siya nawad-an og panimoot, apan wala kini magtugma sa iyang giingon nga istorya.
Pagkahuman sa imbestigasyon, nasayran nga ang tulo sa iyang mga tudlo anaa sa usa ka bag, samtang padayon pa ang kapulisan sa nasud India sa pagpangotana aron makompleto ang tinuod nga panghitabo.
Photo Courtesy to:India Today
