Gikumpirma sa Philippine Atmospheric, Geophysical, and Astronomical Services Administration (PAGASA) nga ang bagyong Fung-Wong, nga pasulod sa Philippine Area of Responsibility (PAR), adunay kusog nga pag-ulan ug hangin nga posibleng mahimong Super Typhoon sa umaabot nga Sabado o Domingo.
Sa pakighinabi sa Juander Radyo Malaybalay nagkanayon si Yvone Pedraza, PAGASA-Bukidnon Weather Specialist nga kini human sa monitoring sa weather satellite, ang bagyo nagpakita og kusog nga 95 kilometros kada oras sa tunga ug paghaguros nga 115 kilometros kada oras samtang nagalihok kini sa tulin nga 10 kilometros kada oras paingon sa kasadpan-amihanang bahin sa nasud.
Dugang ni Pedraza nga kung makasulod sa PAR, ang Fung-Wong pagatawgon nga Bagyong Uwan, diin bisan pa sa kakusog niini gamay ang posibilidad nga maigo ang Mindanao tungod sa kasamtangang direksyon niini paingon sa Northern Part sa Luzon.
Sa karon, nagpahimangno si Pedraza sa mga katawhan sa Bukidnon sa pag-amping ug padayon nga pag-monitor sa kondisyon sa panahon. “Importante kaayo nga magbantay kanunay ug andam sa bisan unsang kalit nga kausaban sa panahon,” matod niya.
via: PAG-ASA MALAYBALAY
