Gabaha ang pahasubo karon sa mga mahal sa kinabuhi og higala sa usa ka 28-anyos nga lalaki human naghunos sa kaugalingon kinabuhi sa Purok Daisy, Barangay Lower Baluran, Imelda, Zamboanga Sibugay, pasado alas 4:20 sa hapon, Nobyembre 6, 2025.
Naila ang biktimang bag-ohay lang nabalo, basketbolista og residente sa nasampit nga lugar. Base sa inisyal nga imbestigasyon sa Imelda Municipal Police Station (MPS), ang nasampit nga indibidwal, nakit-an sa inahan sa asawa sa biktima nga wala nay kinabuhi sulod sa iyang kwarto.
Nakit-an usab nila ang usa ka pouch nga gisudlan sa insecticide nga gitohuang iyang giinom aron tapuson ang iyang kinabuhi. Mipahigayon ang Municipal Health Officer sa Imelda og eksaminasyon ug gideklara nga patay na ang biktima.
Matod pa nga dugay nang nag-antos sa depresyon human mamatay ang iyang asawa tungod sa sakit, ug kini ang posibleng hinungdan sa iyang desisyon.
Ang patay’ng lawas sa biktima karon anaa na sa kustodiya sa iyang pamilya samtang ang Provincial Forensic Unit (PFU) gipangayoan og autopsy aron makumpirma ang eksaktong hinungdan sa kamatayon.
Photo for illustration credits to:The Himalayan Times
