Gipanguluhan sa Iligan City Disaster Risk Reduction and Management Office (ICDRRMO) uban sa mga responders ug evaluators ang gipahigayong 4th Quarter Nationwide Simultaneous Earthquake Drill (NSED) sa may alas 9 sa buntag ning adlaw’ng Hwebes, Nobyembre 6, 2025. Nakatutok ang drill karong adlawa sa City Hall diin adunay lain-laing mga scenario nga respondehan.
Gi- evaluate sa NSED ang kakusog sa alarms o siren, ka-abtik ug hapsay ang evacuation ug pagsunod sa health protocols, disaster control group o marshals nga mo-lead sa evacuation, head count sa designated area, personnel nga mocheck sa safety sa mga buildings, dunay emergency signages, evacuation bags o first-aid kits, ug kung safe ang evacuation areas.
Sumala ni ICDRRMO Head Armien Alorro, importante nga tanan ang makapartisipar sa kalihokan ug makaperform sa duck, cover, and hold aron mas mapalig-on ang kaandam sa tibuok syudad.
Gilauman usab niya nga mas mo-uswag ang rating sa Iligan City kon itandi sa miaging NSED. Apil sa miresponde sa NSED mao ang mga Safety Officers nga bag-ong nakahuman sa Basic Life Support ug Standard First-Aid training.
