Daling gidala sa balay tambalanan ang usa ka 52 anyos nga mag-uuma human gipusil sa kaugalingong igsoon nga kanhing AFP member nga natigayon sa Purok Kaumahan B, Barangay Poblacion, Kumalarang, Zamboanga del Sur, adlaw’ng Miyerkules, Nobyembre 5, 2025.
Sa inisyal nga imbestigasyon sa kapulisan, ang biktima naglingkod lang unta sa balcon sa panimalay sa iyang paryente sa diha nga kalit nahidangat ang suspetsado ug gipusil ang biktima kaduha ka higayon gamit ang kalibre 45 nga pistola.
Igo sa tuong abaga ug dughan ang na-angkon sa biktima nga dali usab gidala sa Kumalarang Rural Health Unit alang sa dinaliang medikasyon ug gi-refer usab dayon tambalanan sa syudad sa Pagadian alang sa mas tukmang medikasyon.
Samtang human sa hitabo dali usab nga misibat ang suspetsado paingon sa Barangay Boyugan East. Na-recover usab sa mirespondeng kapulisan ang kabhang sa bala sa kalibre 45 nga pistola nga gituohan nga gigamit sa suspetsado.
Dugay nang panagbangi sa yuta ang gisundan nga motibo sa kapulisan kon ngano nga nahimo suspetsado ang pagpamusil ngadto sa igsoon nga biktima.
Padayon pa usab nga gipangita sa kapulisan ang suspetsado aron papanubagon sa salaod nga nahimo.
