Nagpahimangno ang Department of Information and Communications Technology (DICT) sa publiko kabahin sa gilauman nga dakong “traffic flood” o Distributed Denial of Service (DDoS) attack sa internet karong umaabot nga Nobyembre 5 ,usa ka matang sa cyber assault nga makapahinay o makapahunong sa pag-access sa mga website ug apps.
Gipasabot sa DICT nga sama kini sa grabe nga traffic jam sa internet, kung asa dungan nga sulayan sa mga hacker nga sudlon ang usa ka website o application, hinungdan sa paghinay sa serbisyo o dili dayon maablian ang site o application nga daw tinuyo nga sirad-an ang agianan sa mga lehitimong user.
Bisan pa man nga giklaro sa DICT nga walay personal account, datos, o kwarta nga makawat sa ingon nga sitwasyon, dili malikayan ang epekto niini sa mga negosyo, serbisyo, ug adlaw-adlaw nga online nga kalihokan sa publiko.
Gisiguro sa DICT nga hugot nilang gimonitor ang kahimtang ug andam ang mga lakang aron mapugngan ang mas lapad nga epekto sa maong cyber attack.
Photo courtesy to: pngkit.com
