Malinawon ug hapsay ang pagsaulog sa Undas 2025 sa lungsod sa Nabunturan, sumala sa Davao de Oro Police Provincial Office (PPO).
Matod ni Police Captain Jusibelle P. Abellion, tagpamaba sa Davao de Oro PPO, hugot nga siguridad ang gipatuman sa kapulisan sa nagkadaiyang sementeryo aron masiguro ang kalinaw ug kahapsay sa mga tawo nga nagbisita sa ilang mga minahal sa kinabuhi.
Gipasabot ni Abellion nga wala silay natala nga krimen, aksidente, o bisan unsang insidente nga nakaapekto sa kasigurohan sa mga lumulupyo ug bisita sa tibuok pagsaulog sa Undas.
Dugang pa niya, dako ang ilang pasalamat sa kooperasyon sa mga katawhan ug lokal nga mga opisyal sa Nabunturan sa ilang aktibong pagtinabangay uban sa kapulisan aron mapadayon ang malinawon nga pag-obserba sa Undas 2025.
