Nadakpan ang usa ka amahan sa Tabuk City, Kalinga, human giingong nangawat og usa ka 1.725-kilogram nga kahon sa gatas sa bata sa usa ka supermarket. Subay sa report, nasakpan kini sa usa ka staff sa tindahan ug dayon gidala sa kapulisan alang sa imbestigasyon.
Matod sa Tabuk City Police, ang maong lalaki usa ka single father nga nawad-an og trabaho human mahuman ang usa ka construction project. Gani, siya ra ang nag-atiman sa iyang anak human gibiyaan sa iyang asawa. Tungod sa kakulang sa kwarta, napugos kini mangawat sa gatas alang sa iyang anak.
Apan imbes nga pasakaan og kaso, gibayran sa hepe sa kapulisan nga si Lt. Col. Jack Angog ang kantidad sa gatas aron mapugngan ang pagkapriso sa amahan ug matabangan nga makasugod og bag-ong kinabuhi.
Gidayeg sa publiko ang maong buhat sa hepe nga nagpakita sa kalooy ug kasingkasing alang sa mga kabus nga naglisod sa panginabuhi. Daghang netizen ang mipahayag nga kini usa ka ehemplo sa “humanity behind the badge,” nga nagpakita nga ang serbisyo publiko dili lang kutob sa pagsilot, apan usab sa pagtabang ug pagpasabot sa mga nagkinahanglan.
Photo Courtesy to:TABUK CPS
