Gibutyag sa Bureau of Fire Protection (BFP) kagahapong adlawa, Oktubre 28 nga nakaheightened alert na o Code Blue ang tanang unit niini ug sa umaabot nga Oktubre 30 hangtod sa Nobyembre 2 full alert o Code Red na sila alang sa pagsaulog sa Adlaw sa mga Santos ug Adlaw sa mga Kalag o Undas.
Matod pa ni BFP Public Information Service Director Senior Supt. Bonifacio Carta nga mokabat sa dul-an 27,500 ka mga bombero ang ipakatap sa mga sementeryo, transport terminals ug uban pang mga dapit kini aron sa paghatag ug hinanaling pagtubag sa emerhensya ug pagpalig-on sa mga paningkamot sa paglikay sa sunog.
Kini ang gipadayag ni Carta atol sa gipahigayong media forum sa Department of the Interior and Local Government (DILG) kagahapong adlawa. Dugang pa niya nga magbutang usab sila ug mga first aid service team station ug motorist assistance desk sa pagpaabot sa pagdagsa sa mga mobisita.
Sa pikas bahin, gibutyag ni PNP spokesperson Brig. Gen. Randulf Tuaño nga adunay kinatibuk-ang 50,253 ka police personnel ang ipakatap sa tibuok nasud, diin ang 35,661 ka personnel ibutang sa 5,065 ka sementeryo ug columbaria ingon man 6,475 ang ipakatap sa motorist assistance hubs ug major thoroughfares.
Samtang mukabat usab sa 5,015 ka Police Assistance Desks (PADS) ang magamit sa mga sementeryo, transport terminals ug mga dagkong dalan isip kabahin sa “Ligtas Undas 2025” security plan.
Sa laing bahin, ang DILG mitaho nga 45,712 ka force multipliers nga gilangkuban sa mga barangay watchmen, radio groups ug civic organizations ang palihokon aron sa pagtabang sa kapulisan aron mamintinar ang kahapsay ug kaluwasan sa tanan.
