Gideklara ni Senador Francis “Kiko” Pangilinan ug sa Bureau of Customs (BOC) ang all-out war batok sa agricultural smuggling human nila pangunahan ang pag-susi sa duha ka 40-foot containers nga adunay smuggled agricultural products nga gibanabanaang nagkantidad og P12.96 million didto sa Manila International Container Port (MICP) niadtong Lunes, Oktubre 27.
Isip chairman sa Senate Committee on Agriculture, Food, and Agrarian Reform, gipangunahan ni Pangilinan ang pagpahigayon og public hearing bahin sa kahimtang sa sektor sa agrikultura sa Pilipinas ug ang epekto sa smuggling sa mga mag-uuma, mangingisda, ekonomiya, ug konsumidor.
Niadtong Lunes, gipangunahan ni Pangilinan ug BOC Assistant Commissioner Vincent Philip Maronilla ang inspeksyon sa duha ka containers nga may misdeclared nga frozen chicken breasts ug fish balls sa MICP.
Gibana-banaang moabot sa kantidad nga P12.96 milyon, ang kargamento nagdeklara og 5,300 ka karton sa fish balls apan nadiskubrehan nga adunay sako-sakong frozen chicken breasts.
Bag-ohay lang, unom ka indibidwal ang gikasuhan og contempt sa Senado ug gipriso, lakip na ang usa ka broker ug usa ka BOC deputy collector sa Port of Subic, tungod kay napakyas sila sa pagkooperar sa imbestigasyon sa komite batok sa kaylap nga agricultural smuggling nga nahitabo sa mga pantalan sa nasod.
Matod ni Pangilinan nga nakig-kooperar sila sa Office of the Ombudsman, Department of Justice (DOJ), ug National Bureau of Investigation (NBI) aron sugdan ang pagmugna og kaso ug pagpasaka og kasong non-bailable batok sa mga smugglers ubos sa Anti-Agricultural Economic Sabotage Law.
Photo courtesy: Kiko Pangilinan/Facebook
