Sugdan na sa Oktubre 29 ang pagplastar sa deployment sa Philippine National Police (PNP) isip pagpangandam sa paghinumdom sa kalag-kalag karong tuiga.
Sa flag ceremony kagahapon sa buntag sa Camp Crame, gipahibalo ni Acting PNP Chief PLtGen. Jose Melencio Nartatez Jr. nga kapin sa 30,000 ka mga pulis ang ideploy sa tibuok nasod sugod Miyerkules hangtod Nobyembre 3 aron masiguro ang seguridad.
Gimanduan na usab niya ang tanang yunit nga bantayan ang mga lugar nga posibleng duawon sa publiko, ilabi na ang sementeryo, pantalan, terminals, ug uban pang mga lugar nga laumang dagsaon sa mga tawo..
Matod ni Nartatez, kinahanglan nga makig-alayon ang kapulisan sa ubang law enforcement agencies aron masiguro nga malinawon,ug hapsay, ang paghinumdom sa mga minatay.
Dugang pa niya, andam ang PNP nga motubag sa mga panginahanglan ug panawagan sa publiko aron mapadayon ang kalinaw ug seguridad sa maong semana.
Gipasabot usab ni Nartatez nga andam na sila dili lang sa deployment apan apil usab sa pagbantay ang uban pang mga lokal nga pamahalaan ug uban pang ahensya.
Una niini, gipahibalo na sa PNP nga magpatuman sila ug full alert status sa Oktubre 31, usa ka adlaw sa dili ang Undas, aron masiguro nga bantay-sarado ang tanang lugar nga adtoon sa publiko.
Photo courtesy to: philippines-times.com
