Nasakmit sa mga otoridad ang armas, bala ug druga dungan sa pagpatuman sa search warrant operation sa Purok Mahogany, Barangay Lumbog, Margosatubig, Zamboanga del Sur, adlaw’ng Dominggo, Oktubre 26, 2025.
Gikasa ang operasyon sa pagpanguna sa Margosatubig Municipal Police Station sa koordinasyon sa 2nd ZSPMFC nga miresulta sa pagkasikop sa usa ka 37 anyos nga mag-uuma ug residente sa Margosatubig, Zamboanga del Sur.
Ang search warrant may kalabutan sa R.A. 10591 kon Comprehensive Firearms and Ammunition Regulation Act ug R.A. 9165 kon Comprehensive Dangerous Drugs Act of 2002.
Nakumpiska atol sa operasyon ang usa ka caliber 38 revolver, tulo ka mga bala sa calibre 38 revolver, 11 ka pakete sa gituohang shabu, usa ka sling bag, ug usa ka black coin purse.
Ang tanang nakuha nga mga ebidensya gipresentar ngadto sa issuing court ug giturn-over ngadto sa Zamboanga del Sur Provincial Forensic Unit 9 alang sa laboratory examination.
Samtang ang dinakpan nga suspetsado nakakustudiya na sa Margosatubig Municipal Police Station alang sa pagpasaka sa tukmang mga kaso.
Photo Courtesy to:Margosatubig Municipal Police Station
