Miaapela si ACT Teachers Representative Antonio Tinio nga imbestigahan ang GSIS tungod sa nadiskubreng PHP8.8 bilyones nga pagkalugi ug mga kuwestiyonable nga investments sa panahon ni GSIS President Jose Arnulfo “Wick” Veloso.
Matod ni Tinio, dili angay’ng mameligro ang kontribusyon sa mga magtutudlo, nurse, ug ubang empleyado sa gobyerno tungod sa pagpasagad ug kakulang sa transparency.
Dugang pa, nga mismo ang mga miyembro sa GSIS board, lakip ang mga pangulo sa legal, risk, ug audit committees, ang nangayo nga mo-resign si Veloso, nga nagpakita og seryosong problema.
Lakip sa gipunting nga sayop ang Php3.67 bilyones nga investment sa Monde Nissin, Nickel Asia, Bloomberry, ug DigiPlus nga wala moagi sa board review, ug ang Php1.2 bilyones nga investment sa usa ka online gambling firm.
Dugang pa, ang Php1.45 bilyones nga Alternergy deal nga hinungdan sa pagsuspenso kang Veloso sa Ombudsman.
Gipasiugda ni Tinio nga halos usa ka milyon nga magtutudlo ang mahimong maapektuhan sa sayop nga pagdumala sa pondo sa GSIS.
Nangandam na ang kongresista og usa ka resolusyon aron panubagon ang mga responsable ug masiguro ang proteksyon sa pension funds sa mga empleyado sa gobyerno.
Photo courtesy: POLITIKO
