Natino na sa Bureau of Fire Protection (BFP) ang hinungdan sa sunog sa buhatan sa Department of Public Works and Highways (DPWH) – Bureau of Research and Standards sa Quezon City kagahapon sa hapon.
Sa inisyal nga report sa BFP National Capital Region, ang insidente tungod sa short-circuit nga naggikan sa kisame sa Records Section sa ikatulong andana sa maong edipisyo. Hinuon giklaro sa BFP nga nagpadayon pa ang mas lawom nga imbestigasyon aron mahibaw-an ang kinatibuk-ang hinungdan ug kung aduna bay laing mga hinungdan nga nakaapekto sa insidente.
Una nang namahayag ang DPWH nga computer unit gikan sa Materials Testing Division ang tinubdan sa sunog, apan wala kini gikompirmar sa BFP sa ilang report.
Gihatagan usab og gibug-aton sa DPWH nga walay importanteng dokumento nga naapektuhan, ilabi na ang may kalambigitan sa mga anomaliya nga konektado sa flood control projects, nga bag-o lang nahimong sentro sa isyu sa ahensya.
Nagsugod ang sunog mga alas 12:30 sa udto. ug giisa sa third alarm tungod sa paspas nga pagkuyanap sa sunog. Ang kalayo hingpit nga napalong ala 1:49 sa hapon, sumala sa mga awtoridad.
Walay natalang naangol sa maong insidente, apan padayon pa ang assessment sa kadaot sa edipisyo ug kagamitan.
via: BFP – Quezon City
