Gilusad sa Department of Health (DOH) ang “Trangkaso Bye-Bye!” nga kampanya isip tubag sa padayong hulga sa trangkaso karong panahon sa ting-ulan ug sa nagsingabot nga hanging Amihan.
Ang kampanya nagtumong sa pagpahinumdom sa publiko sa mga yanong paagi aron malikayan ang trangkaso, sama sa: “Paghugas sa Kamot, Trangkaso Bye-Bye!” “Pahulay sa Balay, Trangkaso Bye-Bye!”, “Kaon ug Prutas ug Utan, Trangkaso Bye-Bye!”
Sa pinakaulahing report sa DOH, kapin sa 6,400 ka kaso sa flu-like illness ang natala gikan sa Septiyembre 28 hangtod Oktubre 11, 2025—usa ka 25% nga pagkunhod kon itandi sa samang panahon sa miaging tuig.
Bisan og walay outbreak, ang DOH nipahinumdom nga ang buwan sa Oktubre hangtod sa Pebrero maoy panahon sa trangkaso sa nasod, busa angay gihapon nga magmatngon ug magmintinar sa kalimpyo, ug dili mokompyansa.
Ang yano nga paghugas sa kamot, igong oras sa pagkatulog ug pagkaon sa mga masustansya dako nga tabang sa paglikay sa sakit.
Gipahinumdoman usab sa DOH ang publiko nga dili moadto sa trabaho o eskwelahan kung adunay mga sintomas sa trangkaso aron malikayan ang pagkaylap sa sakit.
Source: DOH
Photo courtesy:Manila Bulletin
