Nakabuhat og bag-ong Guinness World Record si Daisy Ptak, usa ka 39-anyos nga inahan gikan sa California, U.S.A., alang sa “labing taas nga ginantsilyong scarf nga gihimo sa usa ra ka indibidwal.”
Ang iyang ginantsilyo nga obra adunay gitas-on nga 981 feet ug 11 inches, nga halos parehas ka taas sa usa ka cruise ship.
Nagsugod siya sa maong proyekto niadtong Pebrero 2023, usa ka tuig human niyang makat-on sa paggantsilyo isip paagi aron mapamub-an ang sobra nga paggamit sa gadgets.
Miabot sa kapin $1,000 ang kantidad sa yarn nga nagamit, apan tungod sa tabang ug suporta sa iyang pamilya, mga higala, ug mga donor, natapos niya ang proyekto nga midugay og labaw sa usa ka tuig.
Human niya madawat ang opisyal nga titulo gikan sa Guinness World Records, gipanghatag ni Daisy ang mga bahin sa scarf isip regalo, donasyon, ug gipang-subasta aron makatabang sa lain-laing charitable causes.
via: SFIST
