Giawhag ni House Speaker Faustino “Bojie” Dy III ang tanang barangay officials sa tibuok nasod nga tabangan ang gobyerno sa pakigbatok sa korapsyon, pinaagi sa pagkamabinantayon sa pagpatuman sa mga proyekto sa ilang tagsa-tagsa ka komunidad.
Gibutyag niini atol sa Liga ng mga Barangay Congress nga gipahigayon sa World Trade Center, gipasiugda ni Speaker Dy nga ang pagpasa ug matinud-anon nga nasudnong budget maoy unang lakang sa mas lapad nga kampanya batok sa korapsyon.
Dugang pa ni Dy nga isip lider nga nagsugod sa iyang karera sa barangay level sa Isabela province, gihatagan niya og bili ang papel sa mga lokal nga opisyal sa pagdumala sa aktuwal nga pagpatuman sa mga proyekto, human maaprobahan ang nasudnong pundo.
Busa iyang giawhag ang mga opisyal sa barangay nga aktibong mosusi unsa nga mga proyekto ang ipatuman sa Department of Public Works and Highways (DPWH) sa ilang mga hurisdiksyon.
Gipasabot usab niini nga pinaagi sa aktibong koordinasyon sa mga buhatan sa distrito sa DPWH, mas daling mamonitor sa mga lider sa barangay ang kalidad ug pagsunod sa mga proyekto subay sa gitakdang plano.
Photo courtesy to:Rappler
