Nangayo og tabang ug kooperasyon ang Land Transportation Office (LTO) – Tandag District Office sa tanang municipal mayors sa 1st District sa Surigao del Sur aron mapalapdan ang impormasyon sa Oplan Release Plaka Program, usa ka programa nga nagtinguha sa episyente ug paspas nga pagpagawas sa mga plaka sa rehistradong motor ug sakyanan.
Sa sulat nga gipirmahan ni District Head Jimmy M. Daray, MPA, gipangayo sa LTO nga ang mga mayor maghatag og suporta pinaagi sa pagpaabot sa impormasyon ngadto sa mga barangay ubos sa ilang hurisdiksyon.
Matod sa LTO, importante nga ang mga lokal nga opisyal motabang sa pagpalapad sa impormasyon bahin sa iskedyul ug proseso sa pagkuha sa plaka aron malikayan ang kalibog ug kalangan sa mga motorista.
Gipasabot usab sa LTO nga ang pagpagawas sa mga plaka ilabina sa mga motorsiklo kay libre (WALAY BAYAD) ug wala’y ginakolekta nga bisan unsang bayranan gikan sa mga tag-iya sa sakyanan.
Gidugang pa sa opisina nga ang programa usa ka kabahin sa nasyonal nga paningkamot sa LTO aron mapadali ang paghatag sa mga plaka nga dugay nang gihulat sa mga rehistradong motorista.
