Gibutyag ni Senador Sherwin Gatchalian, Chairman sa Senate Committee on Finance, nga posibleng kuhaan og labaw sa katunga ang ₱625 bilyones nga sugyot nga pondo sa Department of Public Works and Highways (DPWH) alang sa tuig 2026, human sa obserbasyon nga daghang mga proyekto nga adunay “red flag” o mga iregularidad sa maong ahensya.
Sa usa ka interview, giingon ni Gatchalian nga gibanabana nga ₱348 bilyon ang posibleng kuhaon gikan sa kinatibuk-ang pondo sa DPWH. Sa maong kantidad, ₱271 bilyon niini ang naglangkob sa mga proyekto nga may kakulang sa klarong lokasyon, na doble, gibahin aron makalusot, ug mga proyekto nga giapil pag usab gikan pa sa 2025 national budget.
Gisuta usab sa Senado ang 20% nga over costing nga gihatag sa pipila ka mga proyekto sa imprastruktura, diin gituohan nga sobra sa aktwal nga kantidad nga gikinahanglan sa pagtukod.
Matod pa ni Gatchalian, kini nga mga obserbasyon makita sa ginahimo nilang “budget review” nga naglakip sa tanan nga proyekto sa DPWH sa mosunod nga tuig. Ang ilang tumong mao ang pagsiguro nga makatarunganon ug mapuslan ang mga proyekto sa publiko.
Gipahibalo usab sa senador nga dili pa kini pinal nga desisyon, tungod kay naghulat pa ang Senado sa kompleto nga dokumento ug teknikal nga detalye gikan sa DPWH aron maipresentar ug maipatin-aw sa susamang budget hearing.
Gilauman nga sa Oktubre 27, 2025, magpadayon na ang Senate budget hearing aron mapaminawan ang depensa sa DPWH bahin sa ilang mga proyekto ug ipresentar ang mga gikinahanglang dokumento.
PHOTOS COURTESY TO: PRJ
