Nanawagan si Senate Committee on Finance Chair Win Gatchalian sa Inter-Agency Council Against Trafficking (IACAT) nga palig-onon pa ang ilang online information ug awareness campaign batok sa human trafficking, labi na alang sa mga batan-ong Pilipino nga mahimong biktima sa mga peke nga job offers sa gawas sa nasud.
Atol sa pagdungog sa giplanong 2026 budget sa Department of Justice (DOJ), gihangyo ni Gatchalian ang Inter-Agency Council Against Trafficking nga ipasabot kung unsaon mapatas-an ang ilang pondo aron mapaminos ang ihap sa mga kaso sa human trafficking sa nasud.
Sumala ni IACAT Executive Director Atty. Hannah Lizette Manalili, nagsalig sa ilang buhatan ang lain-laing mga ahensya sama sa National Bureau of Investigation (NBI) ug Bureau of Immigration aron mapalig-on ang ilang operasyon batok sa human trafficking.
Gipasabot ni Manalili nga ang cyber tip operations monitoring division sa (IACAT) nagpahigayon og online surveillance dili lang sa mga kaso sa sexual abuse o exploitation sa mga bata, apan apil usab ang mga peke nga job advertisements, illegal adoption, ug pagbaligya og bata.
Naglaum usab si Gatchalian nga pinaagi sa mas taas nga pondo, mas mapalapdan pa sa hintungdang buhatan ang paggamit sa mga digital platforms aron mapugngan ang human trafficking.
Photo courtesy to: manilastandard.net
