Nagpahinumdom ang Philippine Health Insurance Corporation (PhilHealth) sa ilang mga miyembro nga dili magpaambit og personal nga impormasyon sa social media.
Sumala sa ahensya, wala sila nagakolekta sa mga sensitibo nga datos sama sa full name, address, birthday, ug PhilHealth Identification Number (PIN) sa ila official social media accounts.
Ang pahinumdom dungan sa pag-obserbar sa Cybersecurity Awareness Month, diin gipasiugda sa PhilHealth nga ang mga verified Facebook, X (kanhi Twitter), YouTube, Instagram, TikTok, ug Spotify accounts gigamit lamang sa paghimo og mga anunsyo ug pagtubag sa mga general questions.
Gitambagan usab sa ahensya ang publiko nga gamiton lamang ang opisyal nga hotline ug email channels sa PhilHealth alang sa mga pangutana sama sa pag-verify sa PIN, status sa claims, o kasaysayan sa kontribusyon, subay sa Data Privacy Act of 2012.
Dugang pa nga giawhag ang mga Pilipino nga magmabinantayon batok sa mga peke nga account nga nagpakaaron-ingnon nga opisyal nga representante sa ahensya ug i-report dayon kini kung mamatikdan.
Photo courtesy to:PressOne.PH
