Narekober sa hiniusang pwersa sa mga kasundaluhan sa 30th Infantry Battalion ug Intelligence Unit, ilalom sa operational control sa 901st Brigade, ang mga gamit panggubatan nga gilangkoban sa tulo ka dekalibreng armas, lakip ang usa ka Bushmaster 5.56 rifle, M16A1 rifle, ug 40mm grenade launcher. Nakaplagan usab ang upat ka barrel sa .50 caliber, mga landmine, ug daghang bala sa bukiron nga bahin sa Barangay Lobo, Cantilan, Surigao del Sur.
Ang maong operasyon resulta sa kooperasyon ug rebelasyon sa mga kanhing rebelde nga misurender na ug nibalik sa sabakan sa balaod — mga miyembro kaniadto sa napukan nga Sub-Regional Sentro de Gravidad (SRSDG) Westland, ubos sa North Eastern Mindanao Regional Committee (NEMRC) nga naglihok sa rehiyon sa Caraga.
Gituohan nga gilubong kini nga mga armas sa mga teroristang NPA aron makalikay sa padayon nga operasyon sa militar batok kanila.
Sumala ni LTC Albert M. Batingga, Commanding Officer sa 30th Infantry Battalion, “Ang pagkarekober sa maong mga gamit panggubatan usa ka ebidensya nga nagapahinay sa pwersa sa NPA sa Caraga. Wala na silay kapasidad sa paglunsad ug mga opensiba, apan bisan pa niana, magpadayon ang kasundaluhan sa pagtuman sa mandato nga protektahan ang katawhan.”
PHOTO COURTESY TO: 30TH IB
