Gipasigarbohon ang mga batang Sugbuanon human ilang makuha ang mga nag-unang korona sa Kids and Teens Global Pageant Philippines nga gipahigayon sa kaulohan niadtong miaging gabii.
Ang mga mananaog mao sila Eiyannah Khryss Yap nga nakadaog isip Little Miss Global Philippines 2025, Mary Allynah Ciarrah Zabate nga nakakuha sa titulo nga Miss Pre-Teen Global Philippines 2025, Mary Corazon Gualiza nga gikoronahan isip Miss Pre-Teen Global Philippines Tourism 2025, ug Rhean Summer Dela Victoria nga gidad-an sa Miss Teen Global Philippines 2025 title.
Produkto kini sa Cebu Ultimate Catwalk Superstar, usa ka iladong modeling ug Personality Development Camp nga gidumala sa Regional director nga si Prince Joesaphate Amit, uban sa iyang assistant nga si Beth Sabello.
Sumala sa mga tigdumala, wala kini mahitabo kung wala ang hugot nga preparasyon ug disiplina sa ilang mga kandidata. Ilang giandam ang mga kabataan pinaagi sa masinabtanon ug masinati nga training program, diin gitutokan ang hustong paglakaw sa entablado, ug abilidad sa pagsulti sa atubangan sa daghang tawo.
Gipahayag usab ni Amit nga dakong garbo para sa Cebu ang ilang mga kadaugan tungod kay nagpamatuod kini nga ang mga batang Sugbuanon adunay talento, kumpyansa, ug determinasyon nga makigkompetensya sa nasudnong lebel.
“Dili lang ni kadaugan sa among grupo, kundili usa ka inspirasyon alang sa mga kabataan nga nagdamgo nga mahimong modelo o beauty queen,” matod pa ni Amit.
Ang Kids and Teens Global Pageant Philippines usa ka tinuig nga kompetisyon nga nagtumong sa paglambo sa talento, kumpyansa, ug paghasa sa kabataan nga gustong mosulod sa kalibutan sa pageantry ug modeling.
