LALAKI GISUNOG ANG KAUGALINGONG BALAY ARON MAKITA ANG GIIDOLONG BOMBERO

Makapahimoot nga makalagot ang usa ka lalaki sa Northumberland, United Kingdom ang nasilotan og suspended prison sentence human miangkon nga gisunog niya ang iyang kaugalingong balay duha ka higayon sulod sa usa ka gabii aron lang makakita sa mga bumbero nga nagresponde sa sunog.

Nailhan ang suspetsado  nga si James Brown adunay kahuyang o obsession sa mga bumbero. Gusto unta niya nga mahimong usa kanila, apan human kini mapakyas, nahimong tinuod nga fans na lang siya ug kanunay nga motawag sa fire department.

Sumala sa imbestigasyon, sa dihang wala na siya makontento sa pagtawag, iyang gisunog ang iyang balay aron makita ang mga bumbero sa aksyon.

Base sa korte, si Brown mitawag og kapin 80 ka beses sa fire department ug gikuha-an pa og video ang mga bumbero samtang nagpatay sa sunog.

Si Brown miangkon sa duha ka kaso sa arson, ug kaniadtong miaging bulan, gihatagan siya og walo ka bulan nga suspended sentence ug 150 ka oras nga unpaid community service.

Sumala sa iyang abogado, si Brown nagpakita na og pagbasol ug karon nagapangayo og tabang aron makontrol ang iyang obsession sa mga bumbero nga iyahang labing gi-idolo.