Gipangtigbas- patay ang magtiayon sulod sa ilang panimalay sa Zone 6, Brgy. Villarica, Babak District, Island Garden City of Samal (IGACOS) bandang ala 1:00 sa kaadlawon, Oktubre 17, 2025. Subay sa report sa kapulisan, giila ang mga biktima nga sila si Jonathan Prado, 43 anyos, security officer, ug asawa niining si Bhryliant Pearl Prado, 31 anyos.
Nadiskobrehan na lamang sa kauban sa trabaho ang nagbuy-od nga mga patay’ng lawas sa duha nga adunay daghang samad tinigbasan ug naglunang sa ilang kaugalingong dugo.
Nadakpan gilayon sa kapulisan sa IGACOS Police Station ang suspek nga giilang usa ka sakop sa CAFGU, Active Auxillary sa Task Force Samal, 36 anyos, residente sa Prk.6, Sitio Kaimito, Brgy. Miranda, Babak District, IGACOS.
Gibutyag sa hepe sa naasoy nga estasyon nga nag-execute og affidavit of confession ang suspek ug miangkon sa iyang nahimong krimen. Sa pagkakaron, gibalhog na sa IGACOS Police Station custodial facility ang maong suspetsado alang sa tukmang lakang.
Photo courtesy to: IGACOS Police Station
