Gipahibalo sa Department of Social Welfare and Development (DSWD) nga naggahin kini og kapin ₱65 milyon nga humanitarian assistance alang sa mga pamilya nga naapektuhan sa linog nga nahitabo sa Manay, Davao Oriental niadtong Oktubre 10, 2025.
Lakip sa tabang ang pagkaon, non-food items ug ubang panginahanglanon sa mga biktima sa kalamidad.
Pinakadakong kantidad nga tabang ang gihatag sa Davao Oriental nga nagkantidad og ₱58 milyon, samtang ₱3 milyon ang gihatag sa Davao de Oro ug ₱1.6 milyon sa Davao del Norte.
Matod ni DSWD Spokesperson ug Assistant Secretary Irene Dumlao, gipangandaman na usab sa ahensya ang dugang mga hinabang samtang padayon nga ginabuhat ang assessment sa kadaot ug panginahanglan sa mga residente.
Gipang apod-apod ang mga relief goods sa mga apektadong pamilya pinaagi sa koordinasyon sa mga lokal nga pangunang yunit. Gipalig-on usab ang presensya sa mga social workers aron mas mapaspas ang pagtunol sa ayuda ug serbisyo sa mga komunidad nga hilabihang apektado sa linog.
Samtang, nagbutang og water filtration system ang Philippine Army sa Tarragona, Davao Oriental aron masiguro nga adunay limpyo ug luwas nga tubig ang mga residente. Gipaabot sa DSWD nga magpadayon pa ang operasyon hangtod nga mahibalik ang normal nga kahimtang sa mga apektadong lugar.
Photo courtesy to: PNA
