Nakitaan og positibong progreso ang pagpangolekta sa basura human nga gilunsad ang TASK FORCE BASURA SPECIAL OPERATION aron nga maapas ang mga backlogs sa koleksyon sa basura sa syudad.
Nangunay na mismo si Mayor Klarex Uy sa paglunsad niini nga task force aron nga matabangan ang bag-ong kolektor sa basura nga Standard Systems human nga napunting ang ilahang mga kakulangan ug uban pang kakulian o mga hagit diha sa pag-atiman sa basura.
Sumala pa ni Elvisa Mabelin, acting Department Manager sa City Local Environment and Natural Resources Office (CLENRO) nga padayon gihapon ang lokal nga panggamhanan sa pagtrabaho aron nga maapas ang mga nagtapun-og nga basura. Hugot sab ang ilahang koordinasyon sa ubang departamento sa syudad sama sa City Engineering’s Office nga ning tabang sa pagmintina sa Pagalungan Landfill ug pakigtambayayong sa mga kabarangayan.
Kahinumduman nga nihatag lamang og katorse ka adlaw ang mayor aron nga maapas og kuha ang mga basura, busa gipaspasan ang pagpangolekta sa buntag ug gabie.
Nanghinaot si Mabelin nga magpadayon ang consistency sa koleksyon ug hugtanong pagsunod sa mga katawhan sa collection schedule sa basura. Samtang lauman usab nga moabot na ang mga chariot sa Standard System nga mga gagmayng sakyanan aron nga makasulod sa mga gagmayng kadalanan nga dili pwede maagi-an sa dagkong garbage truck.
Photo courtesy: Cagayan de Oro City Information Office
