Gipahayag ni Department of Health Secretary Ted Herbosa nga nisaka pa sa kapin 300 ka Super Health Centers sa tibuok nasud ang napamatud-an nga dili pa gihapon operational.
Sa iyang pag-apil sa inter-agency coordination meeting uban sa Independent Commission for Infrastructure karong adlawa, Oktubre 17, giingon sa kalihim nga una niyang huna-huna nga 297 na lang kini, apan niabot na usab sa 300.
Dugang pa ni Herbosa, kadaghanan sa mga natanggong nga health centers makita sa Luzon tungod kay kini ang pinakadako nga area, diin kapin 170 gikan sa 300 ang didto nahimutang, samtang ang ubang bahin naa sa Visayas ug Mindanao.
Base sa datos sa DOH, gikan sa 878 ka Super Health Centers nga pinondohan ubos sa Health Facility Enhancement Program, 198 ang fully operational, 17 ang dili pa fully operational, 365 ang ongoing construction, ug 300 pa ang wala pa magamit.
Gipahimangnoan na sa DOH ang mga regional directors nga inspeksyunon ug imbistigahon kini uban sa suporta sa independent commission aron masiguro nga magamit sa katawhan ang maong mga pasilidad.
SOURCE: PNA
