Nanawagan si Cagayan de Oro 2nd District Representative Rufus Rodriguez kang Pangulong Ferdinand Marcos Jr. nga hunongon ang plano sa e-visa alang sa mga turistang Chinese nga gilusad sa Embahada sa Pilipinas sa Beijing.
Matod ni Rodriguez, kusgan niyang gikontra ang plano ni Ambassador Jaime FlorCruz, ug iyang giingon nga hulga kini sa seguridad sa nasud tungod sa padayon nga pagdagsa sa mga Chinese nationals, diin daghan kanila ang nalambigit sa espiya, kidnapping-for-ransom, iligal nga sugal, ug ubang krimen.
Gidugang pa sa kongresista nga bag-o lang may mga Chinese spy nga nadakpan nga nagbantay sa mga kampo militar ug mga ahensya sa gobyerno.
Bisan pa man nga tuyo sa e-visa nga pasayonon ang pagbisita sa mga Chinese sa Pilipinas, giinsister ni Rodriguez nga kinahanglan ang mas hugot nga proseso, lakip na ang personal nga interbyu ug masusi nga beripikasyon sa dokumento, aron mapugngan ang pagsulod sa mga espiya ug kriminal.
Matod pa ni Rodriguez, kontra kini sa klaro nga baruganan ni Pangulong Marcos batok sa agresyon sa China sa West Philippine Sea, ug nagpakita kini sa kahuyang sa posisyon sa gobyerno kung itugot ang maong programa.
Gidugang pa ni Rodriguez nga kinahanglan pa lig-onon ang pagpangita sa libo-libong iligal nga Chinese POGO workers ug kriminal nga nagpabilin pa sa nasud.
Sumala sa iyang pahayag, 12 ka mga Chinese nationals ang nadakpan sa Tacloban, ug adunay report nga abot pa sa 10,000 ka Chinese POGO workers ang naa gihapon sa Pilipinas.
Photo courtesy to:News-Inquirer.net
