Daling nagpahigayon ug inspeksyon ang mga otoridad sa mga tunghaan ug mga bilding human nga miigo ang 4.4 magnitude nga linog sa syudad sa Iloilo, pasado alas 6:48 sa buntag kagahapong adlawa.
Base sa datos sa Philippine Institute of Volcanology and Seismology (Phivolcs) sa Iloilo City Operations Center nga ang epicenter niini nahimutang 13 kilometros sa habagatan-habagatan-kasadpan sa Guimbal, Iloilo sa gilawmon nga 10 kilometros. Ang maong insidente nakapahimo sa pagbakwit sa mga tinun-an ug mga empleyado ngadto sa open ground.
Walay gikataho nga kaswalti ug dagkong kadaot nga natala sa maong linog ug gi-awhag ang tanan nga magpabiling kalmado ug magtinabangay.
Samtang natala ang Intensity III sa Nueva Valencia, Guimaras, ug Intensity II usab sa San Lorenzo, Guimaras; Iloilo City; ug Bago City, Negros Occidental. Nakaangkon usab ug hinay nga pagtay-og ang lugar sa Culasi, Antique, ug La Carlota City, Negros Occidental.
Kaalabot niini, naghimo gilayon ug visual inspection ang mga otoridad kini subay sa advisory nga gipagula sa Iloilo City Government nga alayon usab sa DepEd Order No. 022, series of 2024 sa pagkansela sa mga klase aron nga masiguro ang kaluwasan sa mga estudyante.
Padayon usab nga nag-monitor sa mga aftershocks ang City Disaster Risk Reduction and Management Office (CDRRMO) ug nakig-alayon na usab sila sa mga barangay officials alang sa building safety assessments.
Photo courtesy to:PHIVOLCS-DOST/X
