Mius-os ngadto sa P100 milyones ang nahabiling Quick Response Fund (QRF) sa Department of Health (DOH) human gigamit sa pagtubag sa sunodsunod nga mga katalagman karong tuiga 2025.
Sa report sa kaandam sa mga tambalanan alang sa “The Big One,” si Health Secretary Teodoro “Ted” Herbosa niingon nga nagsugod ang tuig sa halos P1 bilyon nga pundo, resulta sa regular nga P500 milyones nga alokasyon ug savings gikan sa miaging tuig, apan tungod sa kadaghan sa mga katalagman nga natubag, ang pundo naminusan pag-ayo.
Tungod niini, ang DOH gikatahong nangayo og dugang pundo sa Department of Budget and Management (DBM), susama sa gihimo sa Department of Social Welfare and Development (DSWD) ug Office of Civil Defense (OCD) sanglit base sa palisiya sa Commission on Audit (COA), dili magamit ang pondo kung wala’y deklarasyon sa State of Calamity.
Hinuon, gipasabot ni Herbosa nga ang QRF mahimong magamit bisan kung walay aktuwal nga kalamidad, ubos sa Republic Act No. 12287 o ang “State of Imminent Disaster” law.
Sumala sa maong balaod, ang maong estado mahimong madeklarar base sa pagtuki ug datus gikan sa PAGASA, PHIVOLCS, ug sa National Disaster Risk Reduction and Management Council (NDRRMC).
Tumong sa nasangpit nga pundo nga masiguro nga adunay hinanaling tubag ang gobyerno, ilabina sa aspeto sa panglawas, panahon sa kalamidad ug emerhensiya.
via: DOH
