Mopaingon sa Davao Oriental karong adlawa Octobre 13, si Presidente Ferdinand Marcos Jr. aron personal nga sutaon ang kahimtang sa mga residente nga naapektuhan sa 7.4 magnitude nga linog niadtong Biyernes, Oktubre 10.
Ang pagbisita sa presidente gitumong aron masiguro ang kaayohan sa mga naapektuhan ug mahatag dayon ang gikinahanglan nga tabang gikan sa gobyerno.
Siya mobisita ang presidente sa Davao Oriental Provincial Hospital sa lungsod sa Manay ug Davao Oriental Provincial Medical Center sa Mati City aron sutaon ang kahimtang sa mga naangol sa linog ug ingon man ang mga nangaguba nga pasilidad sa tambalanan.
Dugang pa nga mobisita usab si Presidente Marcos sa Manay National High School sa dili pa mopadayon sa evacuation center sa lungsod sa Tarragona, aron tan-awon ang kahimtang sa mga bakwit.
Samtang, aduna usab usa ka situation briefing sa Tarragona aron hisgutan ang gidak-on sa kadaot ug ang mga lakang nga gihimo sa lokal ug nasyonal nga mga gobyerno sa relief ug rehabilitation efforts.
Photo Courtesy to:PNA
