Ubay-ubay ka mga estudyante sa Kidapawan City ug Tupi, South Cotabato ang nakasinati og anxiety attack human sa magnitude 7.4 nga linog nga miigo sa Davao Region adlaw nga Biyernes, hinungdan nga gisuspenso dayon sa mga lokal nga kagamhanan ang klase.
Si Maguindanao del Sur Governor Datu Ali Midtimbang mimando sa pagsuspenso sa klase sa tanang lebel, publiko ug pribado, sa tibuok probinsya, diin nabati ang linog sa Intensity III. Gimandoan usab ni Midtimbang ang tanang municipal disaster councils sa pagpahigayon og padayon nga Rapid Damage and Needs Assessment (RDANA) sa tanang school buildings ug government offices.
Sa Kidapawan City, gikompirmar ni Mayor Paolo Evangelista nga walay natala nga casualty sa pagtay-og nga nabatyagan sa Intensity V, gawas lang sa pipila ka mga estudyante nga nakasinati og pagkalipong ug kabalaka.
“No reported physical injuries in the city,” matod ni Evangelista sa social media page sa dakbayan.
Dugang pa niya nga ang inisyal nga mga taho nagpakita nga walay structural damage sa mga school buildings, apan ang RDANA gipahigayon sa tanang konkretong istruktura.
Sa susama, didto sa Tupi, South Cotabato, gisuspenso sa lokal nga kagamhanan ang klase human nalandig sa tambalanan ang mga 25 ka tinun-an sa Tupi National High School human makasinati og pagkalipong.
Gimando usab ni Cotabato City Mayor Bruce Matabalao ang pagsuspenso sa klase sa tanang lebel.
“Kini aron masiguro ang kaluwasan ug kaayohan sa mga estudyante, magtutudlo, ug mga kawani sa eskuylahan nga adunay posibilidad nga adunay mga aftershocks,”dugang niini .
Photo Courtesy to:Philippine News Agency
