Mas mapaayo ug mapaspasan na ang pagsusi sa kalidad sa yuta sa rehiyon sa Caraga human nga makadawat ang Department of Agriculture – Caraga (DA-Caraga) sa Mobile Soil Laboratory (MSL) nga ipanghatag sa Bureau of Soil and Water Management (BSWM), ubos sa pagpatuman sa Presidential Decree No. 1435 ug sa National Soil Health Program (NSHP).
Ang MSL usa ka ten-wheeler truck nga adunay moderno ug kumpletong kagamitan nga makasusi sa 44 ka kemikal, pisikal, ug microbiological nga katangian sa yuta, lakip na ang kalidad sa tubig. Kini usa ka dugang nga suporta sa mga Regional Soil Laboratories aron mapadali ang pagproseso sa mga soil samples gikan sa lain-laing dapit sa rehiyon.
Pinaagi sa soil sampling, masayran ang sustansiya ug pH level sa yuta aron mas husto ang paggamit sa abono, magresulta sa mas dako nga ani, mas ubos nga gasto, ug mas maayo nga pag-atiman sa kalikupan pinaagi sa paglikay sa sobra nga paggamit sa pataba.
Si DA-Caraga Regional Executive Director Arlan M. Mangelen personal nga mitambong sa pagpirma sa Memorandum of Agreement (MOA) alang sa mga kwalipikadong makadawat sa MSL niining Oktubre 9, nga gipahigayon sa BSWM Lopez Convention Hall sa Quezon City.
Sa maong kalihokan, gibutyag nga 16 ka Mobile Soil Laboratories ang ipang-apod-apod sa BSWM ngadto sa nagkadaiyang DA regional offices sa tibuok nasud.
Photo courtesy to DA-CARAGA
