Tulo ka transmission lines sa Mindanao Grid ang kasamtangang dili magamit human sa magnitude 7.4 nga linog nga miigo sa Manay, Davao Oriental mga alas 9:43 sa buntag adlaw nga Biyernes, sumala sa National Grid Corporation of the Philippines (NGCP).
Sa usa ka advisory, giila kini sa NGCP nga Davao-Toril 69kV line, Nabunturan-Asuncion 69kV line, ug Nabunturan-Masara 138kV line. Ang 69kV nga linya, matod pa, “nagsilbi sa mga bahin sa Davao City, Davao del Norte, ug Davao de Oro.”
Sa laing bahin, ang NGCP miingon nga “ang power transmission services sa Northeastern, North Central, ug Southwestern Mindanao nagpabiling lig-on.”
Si Energy Secretary Sharon Garin, sa usa ka briefing, nagkanayon nga upat ka distribution utilities (DUs) ang nakasinati og tripping human sa linog ang Davao Oriental Electric Cooperative (DORECO), Davao Light & Power Company, Cagayan Electric Power and Light Company, ug Cotabato Light and Power Company.
Matod niya nagpadayon sila sa pagtigom og impormasyon gikan sa mga electric cooperatives, generation plants, ug NGCP.
Sa pikas nga bahin ang task force niingon nga ang NGCP nitaho sa mga 731.52MW nga pagkunhod sa kinatibuk-ang load tungod sa auto-tripping sa generation plants.
Sa taho sa NGCP ang Bunawan-Maco 138kV Line auto-tripped mga alas 9:45 sa buntag apan na-energize mga alas 10:25 sa buntag.
Sa report gikan sa National Electrification Administration (NEA), ang task force nagkanayon nga lima ka electric cooperatives ang apektado sa linog, bisan og duha ang anaa na sa normal nga operasyon samtang tulo ang nakasinati og partial power interruption.
Ang duha ka EC mao ang Surigao del Sur I Electric Cooperative, Inc. (SURSECO I) ug Surigao del Sur II Electric Cooperative (SURSECO II), samtang ang tulo pa mao ang Davao Oriental Electric Cooperative, Inc. (DORECO), Davao del Sur Electric Cooperative, Inc. (DASURECO), ug Northern Davao Electric Cooperative, Inc.
SOURCE: Philippine News Agency
